KSSS
Kottayam Social Service Society
Kottayam Social Service Society
പ്രളയ ദുരിതാശ്വാസം 600 കുടുംബങ്ങള്‍ക്ക്
ഭക്ഷ്യകിറ്റുകള്‍ വിതരണം ചെയ്തു
കോട്ടയം: കോട്ടയം അതിരൂപതയുടെ സാമൂഹിക സേവന വിഭാഗമായ കോട്ടയം സോഷ്യല്‍ സര്‍വ്വീസ് സൊസൈറ്റിയുടെ നേതൃത്വത്തില്‍ പ്രളയദുരിതം ബാധിച്ച കോട്ടയം ജില്ലയിലെ കുമരകം, അയ്മനം, ആര്‍പ്പുക്കര, അതിരമ്പുഴ എന്നീ ഗ്രാമപഞ്ചായത്തുകളിലെ 600 കുടുംബങ്ങള്‍ക്ക് ഭക്ഷ്യകിറ്റുകള്‍ വിതരണം ചെയ്തു. ഓക്‌സ്ഫാം ഇന്‍ഡ്യയുടെ സഹകരണത്തോടെ ലഭ്യമാക്കിയ ഭക്ഷ്യകിറ്റുകളുടെ വിതരണോദ്ഘാടനം തെള്ളകം ചൈതന്യയില്‍ തിരുവഞ്ചൂര്‍ രാധാകൃഷ്ണന്‍ എം.എല്‍.എ നിര്‍വ്വഹിച്ചു. പ്രളയ ദുരിതങ്ങളെ അഭിമുഖീകരിക്കേണ്ടി വരുന്ന ജനവിഭാഗങ്ങള്‍ക്ക് കെ.എസ്.എസ്.എസ് പോലുള്ള സന്നദ്ധ സംഘടനകളുടെ നേതൃത്വത്തില്‍ നടപ്പിലാക്കിവരുന്ന സമാശ്വാസ പ്രവര്‍ത്തനങ്ങള്‍ മഹനീയമാണെന്ന്് അദ്ദേഹം ഉദ്ഘാടന പ്രസംഗത്തില്‍ പറഞ്ഞു. കോട്ടയം അതിരൂപത മലങ്കര സഹായ മെത്രാന്‍ ഗിവര്‍ഗ്ഗീസ് മാര്‍ അപ്രേം ചടങ്ങില്‍ അദ്ധ്യക്ഷത വഹിച്ചു. പ്രതിസന്ധിഘട്ടങ്ങളെ മറികടക്കുവാന്‍ കൂട്ടായ പരിശ്രമങ്ങളും പരസ്പരം സഹായിക്കുവാനുള്ള മനസ്ഥിതിയും ഉണ്ടാകണമെന്ന് അദ്ദേഹം അദ്ധ്യക്ഷ പ്രസംഗത്തില്‍ പറഞ്ഞു. കോട്ടയം ജില്ലാ പഞ്ചായത്ത് പ്രസിഡന്റ് നിര്‍മ്മല ജിമ്മി, ഓക്‌സ്ഫാം ഇന്‍ഡ്യ ഹ്യുമാനിറ്റേറിയന്‍ പ്രോഗ്രാം കോര്‍ഡിനേറ്റര്‍ ബസബ് സര്‍ക്കാര്‍, കെ.എസ്.എസ്.എസ് എക്‌സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍, അസിസ്റ്റന്റ് ഡയറക്ടര്‍ ഫാ. മാത്യുസ് വലിയപുത്തന്‍പുരയില്‍, ഏറ്റുമാനൂര്‍ മുനിസിപ്പാലിറ്റി ചെയര്‍പേഴസണ്‍ ലൗലി ജോര്‍ജ്ജ്, കോട്ടയം ജില്ലാപഞ്ചായത്ത് മെമ്പര്‍ ഡോ. റോസമ്മ സോണി, ഏറ്റുമാനൂര്‍ ബ്ലോക്ക് പഞ്ചായത്ത് വൈസ് പ്രസിഡന്റ് തോമസ് കോട്ടൂര്‍, കോട്ടയം മുനിസിപ്പാലിറ്റി കൗണ്‍സിലര്‍ റ്റി.സി റോയി എന്നിവര്‍ പ്രസംഗിച്ചു. അരി, കിഴങ്ങ്, സബോള, വെളിച്ചെണ്ണ, പഞ്ചസാര, ഉപ്പ്, തേയിലപ്പൊടി, മഞ്ഞള്‍പ്പൊടി, മുളക്‌പൊടി, സണ്‍ഫഌവര്‍ ഓയില്‍, റവ, മല്ലിപ്പൊടി, പുട്ട്‌പൊടി, മാസക്കുകള്‍, ഹാന്റ്‌വാഷ്, കുളിസോപ്പ്, അലക്ക് സോപ്പ്, സാനിറ്ററി പാട് എന്നിവ ഉള്‍പ്പെടുന്ന 3000 രൂപാ വീതം വിലയുള്ള ഭക്ഷ്യകിറ്റുകളാണ് ഓരോ കുടുംബത്തിനും ലഭ്യമാക്കിയത്.
